DET LÖP WIE ’N TIET

‘De verkoup löp wie ’n tiet’. Hiemèt gaeve veur aan dat de zaak good löp. ’t Waord ‘tiet’ is ’n aad dialekwaord veur ‘kiep’. ’n Synoniem veur ‘tiet’ is ‘tuut’. Dees wäörd waerde veural gebroek as lokroop bie ’t vore van de ‘kiepe’ (tiete, tute of hónder). Deze lokroop klónk den zoeget wie: ‘tiet-tiet . . .tiet-tiet’. Bie de oetsjpraok van ‘tuut’ en ‘tiet’ mótte de -uu- en de -ie- neet kort mer lank waere oetgesjpraoke. Dus ‘tuut’ en ‘tute’ mèt ’n lange -uu-. Veur ‘tiet’ en ‘tiete’ gèldt ‘tzèlfde. ‘Tiet’ (NL> kip)mótte v’r in lingte oetsjpraeke wie ‘tied’ (NL> tijd). ‘Tiet’ waerd taegewaordig allein nag mer kort oetgesjpraoke, mer den beteikent ’t waal ’n vrouwebors. Vreuger waar d’r ’n versjael in oetsjpraok tösse ‘tiet-tiete’ (NL> kip-kippen) en ‘tiet-tiete’ (NL> vrouwenborsten). As get ‘löp wie ’n tiet’ den löp alles vlot, alles dreit soepel.Zake kènne figuurlik vlot loupe, wie kiepe en neet wie borste. Kakelende en róndjtrippelende borste besjtaon neet. Is ’t nag te volge? Ónthaaj den mer: ‘Tiete höbbe gen tiete’.

Klik hier om je gratis in te schrijven voor Puik | Deel deze pagina: