’T LIMBURGSE GEDÖLD DRIEF WEG

’t is ’n kwestie van gedöld toet hiel Holland Limburgs lölt’. Idderein kènt ‘t,

idderein zingk ’t. Mer daonao den? Den is ’t krangsóm en den duit has idderein mèt aan de nieje versie: ’t Is ’n kwestie van gedöld toet hiel Limburg Hollands lölt’. Zjwartkiekerie? Nae, ech neet. Doot mer èns dageliks bie dich zèlf de originele Limburgse ‘zèlftes’. Vinjs se det leuk? Veurdet se ’t door höbs begint ’t hie al mèt. Leuk sjteit in de top tieën van ‘Óntjlimburgere’. Leuk vinje veur allang leuker as sjoeën en sjónder. En de leukste is de bèste en de sjónste is det al lang neet mieër. Ós dialekwäörd sjpeule veur iddere daag zoeëmer nao de Maas. Die drieve den langzaam nao ‘t weste en verdwiene dao veurgood inne zieë. God wèt waohaer? Thoes pómpe veur den al mer nieje dialekwäörd (?) nao baove: Moord, roofvogel, aarbei, tuin, ham, perzik, lucifer, bang, eekhoorn, ekster, kruidethee in plaats van maord, roufvogel, aerbaes, haof, sjink, peers, zjwaegelke, sjoew, eiketske, aegers, krujethieë. Op den doer klinke de echte dialekwäörd ós vraemp inne oeëre en dörve veur die neet mieër te gebroeke , sjoew det die ‘raar’ euverkómme. Veur wille toch zeker neet opvalle door ‘raar’ klinkende wäörd te gebroeke. Gelökkig geuf ’t wäörd die zich neet zoe sjnel laote wegsjpeule. Bieveurbeeld ‘kroet’ of ‘kruutje’. Det zal neet vervange waere door sjtroop en zeker neet door sjtroopje. Want den dinke ze in Holland det se get mèt sjtruipe te make höbs en in Limburg waers se veur ‘ne ‘kakker’ aangezeen mèt dien ‘sjtroopje oppe bótterham’. Kruutje blief ech nag waal lang plekke.

Klik hier om je gratis in te schrijven voor Puik | Deel deze pagina: