VAN TIELEPOSSE NAO BERGEMUUSKE

Bergemuuske sjpele is in ózze regio algemein bekènd, al waert ’t hie en dao get angers geneump. Berghuuske sjpele in Azeraoj en Neel; bergmenke sjpele in Remunj, Herte en Häör. In ’t Zjwaams waordebook sjteit zèlfs ‘ne gans angere variant ‘sjtokke’. In gans Limburg kómme nag mieër aafwiekende variante veur. Tieleposse is in ós dialek verdreve door bergemuuske. Allein in Hors en Grubbevors kump ’t ouch nag veur as tielepols en tillepols speule. Tieleposse kwaam ouch veur in de grenssjtreek mèt Pruses, dao waerde ’t Tilleposten of Pilleposten geneump. In Mieëldere (Meerlo) zègke ze ouch pieleposte. In ’t Ingels besteit ’t waord pile [oetsjpraok > pail] en ouch in ’t Frans [oetsjpraok > piel]. Pile beteikent ‘ne sjtapel, ‘ne houp, ‘ne berm.

In ‘Plattdüütsch’ beteikende Tile [oetsjpraok > tiele] ’n verzameling kaoresjobbe. Dees sjobbe waerde taegenein gezatte en zoeë óntsjting ‘ne kleine kaoreberm. Tieleposse waar dus zich ‘posteren’ (zich verberge) achter ‘ne kleine kaoreberm, ‘n oetdrökking die veur deile mèt ’t has oetgesjtorve Plattdüütsch van ós naobere euver de päöl. Plattdüütsch is gans verdreve door ’t Hoeëgdüütsch. Bie ós is ’t plat nag neet oetgesjtorve, tieleposse blief waal veurgood verborge en kump noeëts mier oet, blief zitte wao ’t zit. En wie zal ’t aafloupe mèt ós bergemuuske? Waem neet weg is, is gezeen!

Klik hier om je gratis in te schrijven voor Puik | Deel deze pagina: