Sintermerte en Hoeperdepoep

Mèt Sintermerte zingk idderein oet volle bors ‘Sintermertes veugelke’ op de muzikale klanken van de hermenie en as det leedje aafgeloupe is den kump Hoeperdepoep d’rachteraan. Hoeperdepoep is van hoes oet ’n aad Hollands leedje det in gans Nedelandj bekènd is en allerlei variaties haet. De kernteks is euveral geliek: “En Hoeperdepoep zat op de stoep en laten we vrolijk wezen; Hoeperdepoep zat op de stoep en laten we vrolijk zijn.” De teks sjleit eigelik nörges op, ’t is ’n nonsens leedje, mer idderein zingk ’t gaer. Veural de melodie is populair.

Tösse Vènlo en Remunj waert ’t nao Sintermertesveugelke gezónge, as idderein in optoch nao de Sintermerteshoup löp. De teks is as volg:

En Hoeperdepoep zoot op de stoep en leet d'r eine vlege
Hoeperdepoep zoot op de stoep en leet d'r eine gaon!
Hoera, hoera, wat höbbe die boere ‘n laeve
Hoera, hoera, wat höbbe die boere ‘n lol!

Dök waere de lètste twieë regels ouch nag èns extra veurop gesjpeeld en gezónge.

In sommige plaatse zinge ze Mieke de Woep in plaats van Hoeperdepoep.

De vraog nao de herkóms van Hoeperdepoep kump van Roel Killaars.

Klik hier om je gratis in te schrijven voor Puik | Deel deze pagina: