Luxe kebuiske op de Solberg

Has idderein haaj vreuger waal ein of anger sjöpke. Later hoot det sjuurke en taegewaordig hèt det berging. De veurgenger van ‘t sjöpke hoot kebuiske. Eigelik waar det neet mieër den ’n zèlf ineingesjoesterd hutje mèt ’n raamwèrk van gecarboleiemde päöl en daotaege waerde den get plenk genaegeld. As toegang deende dök ’n aaj deur die mèt ’n sjaag vergrendeld waerde. Simpele raemkes veur en opziej gove al ’n get luxere oetsjtraoling. Op ’t nao de achterkantj sjuuns aafloupend daak kwame aaj panne of hiel dunne betuum van de rol, ouch pappedek geneump. Ós modertaalwaord kebuiske sjtamp aaf van ’t Middelnederlandse cabuse, det waar ’n kaokplaats, veurraodkamer op ’n sjeep (kombuis). Later waerde de beteikenis in ós modertaal breier: wachhökske, sjuulhut, sjafkieët, entreepos, kassahökske. Synonieme veur kebuiske zien: kabaus, kabuuske, kabuisje, kaboes.