Sjtokbroeëd is gelinde mik

Ós modertaal haet net wie ’t Nederlands väöl lieënwäörd oet angere tale. Nederlandse weitesjappers höbbe vasgestèld det 70 procent van alle Nederlandse wäörd gelinde wäörd zien. Veur ’t Limburgs is det nag neet weitesjappelik vasgestèld. Waal weite v’r det ’t Limburgs, wao ós modertaal bie huuërt, allewiel ‘op ermood sjteit’. Det beteikent det veur sjlechte kaarte höbbe wat ós waordesjat aangeit. Nag good broekbare wäörd verdwiene en nieje wäörd zien allemaol gelind. Sjtokbroeëd is eigelik broeëd van ‘ne sjtok (sjtapel sjpeelkaarte nao ‘t oetdeile). Sjleit ech nörges op. Broeëd is roggebroeëd of zjwartbroeëd. Brood is ‘ne mik (of wèk). Stok is ‘ne sjtek of knöppel. Stokbrood is dus in good Limburgs sjtekmik of knöppelmik. Det is ‘ne mik, dae op ‘ne sjtek of knöppel liek. Sjtokbroeëd is jaomer genóg neet mieër oet ós modertaal weg te knöppele en daomèt waert ózze (taal)ermood weer get grótter.