OZELE

Van ozel haet idderein waal èns las. Bie ozelig waer höbbe veur las van de kaaj. Veural as ’t erg kaad, naat en sjuverig is, den kènne veur waal èns ram verozeld zien. Ozel lieje veur neet allein van de kaaj. Ozel kènne veur ouch kriege as ’t ós financieel sjlech geit of as veur väöl probleme höbbe mèt ós gezóndjheid of anger leid en ieëlenj det op ós laevespaad kump.

As veur zègke ‘Die höbbe väöl geozeld’ den is wiejere oetlèk neet mier nuuedig. As veur get ‘van ermen ozel’ mótte doon den höbbe veur gèn angere keus. Ozelaer neume veur emes dae in de ozel zit. Ouch plante, buim of bieëste die neet good greuje neume veur ozelaers. Ozel kump veural in Midde- en Noord-Limburg veur. Ouch in Duitse dialekte kènne ze Osel en oselig. In Ingelse dialekte is ‘oozle’ sjnel en kort aomhaole (ónger angere bie ’t razele van de kaaj). Oozly (ouch: oosly, ousley, ouzily en ozzely) beteikent ermeutig, sjloeberechtig, sjebbetig, ermelik. Dus neet allein veur höbbe waal èns ‘ozel’.

Klik hier om je gratis in te schrijven voor Puik | Deel deze pagina: