Koekdenan

Tekst: Paul Bloemen

De originele Couque de Dinant is knaokehel en ’t bèste veur de tenj is óm d’r kleine sjtökskes mèt de henj van aaf te braeke en die den inne móndj zaach te laote waere of inne kóffie of thieë te soppe. Dae kook kump van oersjpróng oet Dinant in Bels en is gemaak van tarwebloom en honing. Hae waert gebakke in allerlei vorme van klein toet hiel groeët. Sommige luuj hange z’ón groeëte aafbeelding as decoratie aan de moer. Róndj Sinterklaos dreie de banketbekkers in Dinant väöl euveroere. Koekdenan of koekdenang is de oetsjpraok van Couque de Dinant in ós modertaal en dae oetsjpraok liek op de originele Franse oetsjpraok. Mer ózze koekdenan is gans angers. Dae waert gemaak van rogkebloom of half óm half mèt tarwebloom, dónkere basterdsókker, anies en honing. Meistal in de vorm van ’n póp of get klènder mèt ’n aafbeelding van Sinterklaos of Pieterbaas. In ’t Nederlands hèt ózze koekdenang ‘taaitaai’. Al is taaitaai tei, veur höbbe d’r in ós modertaal gènne teitei van gemaak, veur höbbe gekaoze veur de naam koekdenan. Mer det is den waal teie koekdenan, väöl zaachter as de keihelle echte Couque de Dinant. (De vraog euver koekdenan kump van Louis de Rijck oet de Ruiver.)

Klik hier om je gratis in te schrijven voor Puik | Deel deze pagina: