Ziepuigskes of ’n sjek oug?

Tekst: Paul Bloemen

Waal èns gehad? Gelökkig geit ’t euver. Ziepuigskes is ’n vreugere benaming veur ’n óntsjtaeking euver de ganse lingte van de renj aan de ougleje, roeëd van kleur en mei get opgezatte. De óntsjtaeking geit waal èns gepaard mèt etterig vóch waodoor de ougsvlumme (wimpers) aan elkaar plekke. Door de ougirritatie waert extra väöl traonvóch geproduceerd. Later waerde de beteikenis van ziepuigskes rumer: half toeë, get diekere uig door sjlaopgebrek, verkaajdigheid, huikoorts of duchtig alcoholgebroek, ouch waal èns zoepuigskes geneump. Ziep is ’n benaming veur ’n sjteine afwateringsgäöt of ’n sjmaal afwateringsbaekske. De naam kump aaf van ‘t Middelnederlandse ‘sipe’ (1650). Dao is weer ziepe, ziebele (sijpelen) van aafgeleid. Van väöl traonvóch kries se ’n ziepnaas. As ’n blauw oug heilt den geit ’t langzaam verkleure. Z’ón verkleurd oug hèt ’n sjek oug. Sjek beteikent gevlekt. (De vraog nao de beteikenis van ziepuigskes kump van Jan en Hennie Geurts oet Bezel)

Klik hier om je gratis in te schrijven voor Puik | Deel deze pagina: